ቅድስት አርሴማ፡ ትክክለኛው የቤትርስቲያን ሥዕሏ የቱ ነው? የመጨረሻ ክፍል


በስመ አብ ወወልድ ወመንፈስ ቅዱስ አሐዱ አምላክ አሜን

‹‹የቅድስት አርሴማ ሥዕል በቤተክርስቲያን ትክክለኛው ሥዕሏ የቱ ነው?›› በሚለው ርዕስ የሚቀርበው ተከታታይ ጽሑፍ የመጨረሻው ክፍል እነሆ፡፡ ይህ ጽሑፍ የሚዳሰሰው የቅድስት አርሴማ ሥዕል ተብለው በስፋት የሚሰራጩትን ቅዱሳት አንስት አጠር ያለ ታሪካቸውን ሲሆን ዓላማው ደግሞ ምእመናን ትክክለኛዎቹን የሥዕሉ ባለቤቶችን አውቀው እንዲያከብሩ ሲቀጥልም እንዲማጸኑባቸው ነው፡፡ በመሆኑም ከሥር የቅዱሳኑን አጭር ታሪክ በቅደም ተከትል ይቀርባል መልካም ንባብ፡፡ click for pdf.

saints that are called saint arsema
Icon of  Saints that are called saint Arsema

1.     ቅድስት በርበራ (Η ΑΓΙΑ ΒΑΡΒΑΡΑ፣ Αγία Βαρβάρα፡ Saint Barbara)

ቅድስት በርብራ በማክሲምያኖስ ዘመን (305-311) የተነሣች ታላቅ ሰማእት ስትሆን አባቷ ዲዮስቆሮስ የተባለ ሀብታም እና ዝነኛ ጣዖት አምላኪ ሰው ነበር፡፡ ይህ ዲዮስቆሮስ ባለቤቱ ካረፈች በኋላ ሕይወቱን ለልጁ ለቅድስት በርብራ ማሰብ ጀመረ፡፡ የቅድስት በርብራን ደምግባቷንና ውበቷን ተመልክቶ ከሰዎች ዓይን እንድትጠበቅና ከውጪው ዓለም እዳትግናኝ እርሷን ለመከላከል ሲል ዲዮስቆሮስ በትልቅ ቤተ መንግሥት አስቆልፎባት ነበር፡፡ ወደ ክፍሏም መግባት የሚችሉት የጣዖት አምላኪ ምምህራኖቹ ብቻ ነበሩ፡፡

ቅድሰት በርብራም አባቷ ባሰራላት ቤተመንግሥት ማማ ላይ ሳለች ቀን ቀን ላይ ሜዳው ላይ የሚታየው ውብ መልክአ ምድር፣ የአበቦችን ውበት የፀሐይን ብርሃን የወንዞችን አወራራድ፤ ማታ ማታ ላይ ደግሞ በሰማይ የሚታየው የከዋክብት ሥርዓት ውብ የሆነውን የእግዚአብሔር ሥራ ስትመለከት አባቷና ጣዖት አምላኪ መምህራኑ የሚመኩባቸው ጣዖቶች ይህንን ድንቅ ሥራ አንዳል ፈጠሩ ተገነዘበች፡፡ በዚህን ወቀትም ራሷን በድንግልና ጠብቃ ለመኖር ወሰነች፡፡

አባቷም በሀገሩ የውበቷን ነገር ሰምተው የጋብቻ ጥያቄ ለልጁ የሚያቀርቡትን ይዞ በልምና ቢጠይቅም ሰማእቷ ግን የአንዳቸውንም ሀሳብ ሳትቀበል ቀረች፡፡ በዚህም ወቅት አባቷ ለብቻዋ በመኖሯ ነው ይህ ሊከሰት የቻለው ብሎ ከቤተ መንግሥቱ እንድትወጣ እና ከፈለገችው ሰው ጋር እንድትገኛኝ እና ጓደኝነት እንደትመሠርት ፈቀደ፡፡ በዚህም ወቅት ወጣት ክርስቲያን የሆኑ አገልጋዮችን በከተማ ውስጥ አግኝታ ስለዓለም ፈጣሪ፣ ስለ ምስጢረ ሥላሴ እና ክርስትና በአጠቃላይ እስተማሯት፡፡ ከእስክንድርያም በነጋዴ ተመስሎ በመጣ ቄስ የእግዚአብሔር ልጅነት በጥምቀት ገንዘብ አደረገች፡፡

ይህ በሚሆንበት ወቅትም አባቷ ጉዞ አጋጥሞት ከመሄዱ በፊት እርሷ ከምትገኝበት ስፍራ አካባቢ ውብ የሆነ የመታጠቢያ ክፍል እንዲሠራለት አዝዞ ወደ ጉዞው ይሄዳል፡፡ የክፍሉ ደቡብ ገጽ  ላይ አባቷ ሁለት መስኮቶችን እንዲሠራ አዝዞ የሄደ ቢሆንም የእርሱን አለመኖር ተጠቅማ ቅድስት በርብራ አንድ መስኮት ምስጢረ ሥላሴን እንዲወክል በማሰብ አሰጨምራ አሰራች፡፡ በመጣጠቢያው ክፍል የእብነበረድ ግድግዳ ላይም በጣቶቿ የመስቀልን ቅርጽ ፍቃ ሳለችበት፡፡ የመስቀሉ አፋፋቅና ጥልቀቱ በብረት የተሠራ የሚመስል የነበር ሲሆን ታሪኳም በስንክሳር በተጻፈበት ወቅትም ይህ የእብነ በረድ መታጠቢያ ክፍልና የመስቀሉ ቅርጽ ይታይ ነበር፡፡

አባቷም ከጉዞው ሲመለስ በመታጠቢያው ክፍል የሆነውን በተመለከት ጊዜ ምክንያቱን ለሰማዕቷ ሲጠይቃት ስለ ምስጢረ ሥላሴ እና ነገረ እግዚአብሔር ነገረችው፡፡ በዚህም ወቅት ክርስትናን እንድትክድና ጣዖት እንድታመልክ በጠየቃት ወቅት ፈቃደኛ አለመሆኗን ተከትሎ በንዴት በሰይፍ ሊመታት ሲል ቅድስቷ ከአባቷ በፍጥነት አመለጠች፡፡ አንድ ኮረብታ በደረሰች ጊዜ ኮረብቷዋ በተአምራታ መልኩ ተከፍታ ዋጠቻት በተቃራኒው የኮረብታው በኩልም ከአባቷ ራሷን ደበቀች፡፡ በዚህን ወቅትም በአካባቢው ሁለተ እረኞች ይህንን የተመለከቱ ነበር፡፡

የክርስቶስ ሙሽራና ሰማዕታት የሆናችሁ ቅድስት በርብራ እና ቅድስት ኡልያና ለእኛ ጸልዩልን፡፡
በቅብጥ ቤተክርስቲያን አሣሣል የተሣለ የቅድስት በርብራ እና ቅድስት ኡልያና ሥዕል

አባቷም ከብዙ ልፋት በኋላ በኮረብታው አከባቢ እነዚያን እረኞች አገኛቸው፡፡ አንደኛው እረኛ አባቷ ስለ ቅድስት በርብራ በጠየቀው ጊዜ አሳፈረው ምንም አልነገረውም፤ ሆኖም ግን ሌላኛው እረኛ ሰማዕቷን በመካድ ያለችበትን ቦታ ለዲዮስቆሮስ ነገረው፡፡ እርሱም ወደ ድንጋይነት የሚጠብቃቸው ከብቶችም ወደ አንበጣነት ተቀየሩ፡፡

ዲዮስቆሮስም ቅድስት በርበራ ያለችበትን ቦታ ሄዶ ከያዛት በኋላ ብዙ መከራን በመደብደብ አደረሰባት፡፡ ዳግመኛም ለጠባቂዎች በረሃብ እንዲቀጧት አስረከባት፡፡ ከዚህን በኋላ ለአካባቢው አስተዳዳሪ ማርጢያነስ (Martianus) አሳልፎ ሰጣት፡፡ አብዝተው ቅድስት በርብራን መቷት፤ ባልለፋም ቆዳ እየገረፉና ሕመሙ የበለጠ እንዲሰማት በልብስ ቁስሏን እየፈተጉ መከራውን አጸኑባት፡፡

በምሽት ግን ቅድስት በርብራ ይህ ሁሉ መከራ ቢደርስባትም አብዝታ ወደ ክርስቶስ ትጸልይ ነበር፡፡ ጌታም ወደ እርሷ በአካል ተገልጦ በመምጣት ከቁስሏ ይፈውሳት ነበር፡፡ በሚቀጥለው ቀንም ደግሞ አዲስ በሆነ መንገድ መከራ ማጽናታቸው ይቀጥሉ ነበር፡፡

ኡልያና የምትባል በከተማው የምትኖር አንድ ደግ ክርስቲያን ሴት ነበረች፤ እርሷም በቅድስት በርብራ ላይ የሚፈጸመውን ግፍና እንግልት ተመልክታ ስህተትናቱን በአደባባይ ተናገረች፡፡ ክርስቲያን መሆኗንም ለሁሉም ገለጸች፡፡ እነርሱም ቅድስት ኡልያናን ይዘው ከቅድስት በርብራ ጋር አብረው ለብዙ ጊዜያት መከራ አጸኑባቸው፡፡ ብዙ መከራ ካደረጉባቸው በኋላ በአደባባይ ለሳቅና ፌዝ እንዲሆን ዕርቃናቸው አወጧቸው፡፡ ሆኖም ግን በቅድስት በርብራ ጸሎት ልዑል እግዚአብሔር መልአኩን ልኮ ውብ በሆነ ልብስ ቅዱስ አካላቸውን ሸፈነላቸው፡፡ ከዚህም በኋላ ሁለቱ ቅዱሳን የሰማእትነት አክሊልን ተቀዳጁ፡፡ ቅድስት በርብራም በአባቷ እጅ አንገቷ ተሰይፎ የሰማእትነት አክሊል ተቀበለች፡፡ (የታህሳስ 8 ስንክሳርን እንዲሁም መምህር እንግዳ መርጊያ። የኒቆሞዲያዋ ኮከብ ሰማዕት ቅድስት በርብራ። መጽሐፍን ለተጨማሪ ማብራሪያ ያንብቡ)

ለአባቷ እና ለማርጢያነስ ግን ፍጻሚያቸው አላማረም ምክንያቱም ሁለቱም በመብረቅ ተመትተው ሞተዋልና፡፡

የቅድስት በርብራና ቅድስት ኡሊያና በረከትና ምልጃቸው ይድረሰን፡፡[1]

ምንጭ

1. የታህሳስ 8 ስንክሳር

http://en.wikipedia.org/wiki/Saint_Barbara

http://orthodoxwiki.org/Barbara_of_Heliopolis

http://www.oramaworld.com/en/p/10508/Saint_Barbara_-_Nazarene_Art_Icon

2.    ቅድስት ሉሲያ

ቅድስት ሉሲያ (283-304) በሲራከስ (Syracuse) የተወለደችና በዲዮቅልጢያኖስ ዘመነ ሰማዕታት ወቅት የሰማዕትነት አክሊልን በ304 ዓ.ም. አካባቢ የተቀበለች ቅድስት እናት ነበረች፡፡ ሉሲያ የሚለው ቃል ከላቲኑ ሉሲያስ ወይም ለክስ ከሚለው ቃል የመጣ ሲሆን ትርጉሙ ብርሃን ማለት ነው፡፡ ይህ ደግሞ በትውፊት ቅድስት ሉሲያ ሰማዕትነት ከመቀበሏ በፊት ዓይኖቿን እንደወጡ ካለው ትውፊት ጋር ይገናዘባል፡፡ ይህንንም ተከትሎ ስትሣል በሰሀን ላይ ዓይኖችን ይዛ ትሣላለች፤ ምሳሌነቱም የዓይነ ብርሃን እና የዓይነ ሥውራን ረዳት እና ጠባቂነቷን ያመለክታል፡፡

 ቅድስት ሉሲያ (Saint Lucia)
ቅድስት ሉሲያ (Saint Lucia) በምዕራባውያን ቤተክርስቲያን አሣሣል የተሣለ

ቅድስት ሉሲያ ከሀብታምና ከመኳኳንት ወገን ከሆኑ ወላጆች በ283 ገደማ ተወለደች፡፡ አባቷ በልጅነቷ የሞተ ስለነበር እናቷ አውጣኪያ ለብቻዋ አሰደገቻት፡፡ እናቷ በተቅማጥ በሽታ ለ4 ዓመታት ስትሰቃይ የነበረ ሲሆን በወቅቱ ቅድስት አጋታ ዘፓሌርሞ የተባለችን ጻድቅ ታሪክ በመስማቷ እና በወንጌል የጌታን ልብስ ነክታ የዳነችውን ሴት ታሪክ በማመን ለእናቷ ወደ ጸድቋ መቃብር ሄደው እንዲጸልዩ አደረገች፡፡

ሌሊቱንም ሲጸልዩ ከቆዩ በኋላ እንቅልፍ አሸለባቸው፡፡ ከዚህም በኋላ በራዕይ ቅድስት አጋታ ተገልጣላት ‹‹እኔ  ለካታኒያ  እንደሆንሁ አንቺም በቅርቡ ለሲራከስ ክብር ትሆኛለሽ›› አለቻት፡፡ በዚያን ወቅትም እናቷ ከሕመሟ ዳነች፤ ቅድስት ሉሲያም ከዚያን ወቅት ጀምሮ በድብቅ ረሷንና ድንግልናዋን ለእግዚአብሔር ሰጠች፡፡ ሀብቷንም ለድሆች ታከፋፍል ጀመረች፡፡

በወቅቱ የነበረውን ጣዖት አምላኪ የጋብቻ ጥያቄ ባለመቀበሏ ለአካባቢው ገዢ ክርስቲያንነቷን ገለጠባት እርሷም በሃይማኖቷ ምክንያት ተያዘች፡፡ በመጀመሪያ ጣዖት አምላኪዎቹ እርሷን ለማዋረድ ወደ ሴተኛ አዳሪዎች ቦታ ሊዋሰዷት ቢጥሩ በኃይለ እግዚአብሔር ከቆመችበት ስፍራ ማንቀሳቀስ ተሳናቸው፤ በዚህም ድንግልናዋ ተጠበቀ፡፡ ዳግመኛም ወደ ነበረችበት ስፍራ ትላልቅ እንጨቶች ከምረው በእሳት ሊያቃጥሏት ቢሞክሩም እግዚአብሔር ግን አዳናት፡፡ በመጨረሻም ሰማዕቷ ነፍሷን ለእግዚአብሔር አሳልፋ ሰጥታ በሰይፍ ሰማዕትነትን ተቀበለች፡፡

ቅድስት ሉሲያ ሰማዕትነት ከመቀበሏ በፊት ዓይኖቿን ወጥተው የነበሩ ሲሆን ቅዱስ አካሏን በክብር ለመቅበር ሲዘጋጁ ቅዱሳን ዓይኖቿ በተአምራታዊ መልኩ ተመልሰው ተገኝተዋል፡፡

መታሰቢያዋም በታህሳስ 4 (December 13) ቀን ነው፡፡

የቅድስት ሉሲያ በረከትና ምልጃዋ ይድረሰን፡፡[2]

ምንጭ

2. Saint Lucy፡https://en.wikipedia.org/wiki/Saint_Lucy

Lucy of Syracuse፡ http://orthodoxwiki.org/Lucy_of_Syracuse

3.    ቅድስት ኪርያኬ

ቅድስት ኪርያኬ (Saint Kyriake፣ በጽርዕ: Αγία Κυριακή,; በላቲን: Santa Domenica) ከግሪካውያን ዶሮተስ እና አውሳብያ ከተባሉት ደግና ባለጠጎች ክርስቲያኖች በስለት የተገኘች ቅድስት እና ሰማዕት ነበረች፡፡ እናት እና አባቷ ልጅ ስላልነበራቸው ያለማቋረጥ በጸሎት እግዚአብሔርን ቢለምኑት ቅድስቷን እግዚአብሔር ልጅ ትሆናቸው ዘንድ ሰጣቸው፡፡

ቅድስት ኪይሪያኬ(Η ΑΓΙΑ KYPIAKH Saint Kyriake)
ቅድስት ኪይሪያኬ(Η ΑΓΙΑ KYPIAKH Saint Kyriake) በባይዛታየን ቤተክርስቲያን አሣሣል የተሣለ

ቅድስት ኪርያኬም መንፈሳዊ ሕይወትን ገንዘብ በማድረግ ከልጅነቷ ጀምሮ ራሷን ለእግዚአብሔር ቀደሰች፡፡ ባደገችም ወቅት በሥጋ እና በነፍስ ውብ በመሆኗ ብዙ ሰዎች እርሷን ሊያጩ ይመጡ ነበር፡፡ ሆኖም ግን ሰማዕቷ በፈቃዷ የክርስቶስ ሙሽራ ለመሆንና በድንግልና ለመኖር ስለወሰነች የጋብቻ ጥያቄያቸውን ባለመቀበል ትመልሳቸው ነበር፡፡

ወላጆቿ ባለጠጎች መሆናቸውን ተከትሎ በኒቆሞድያ የነበረ አንድ ዳኛም ለልጁ ሊድራት ከፈልጉት ሰዎች አንዱ ነበር ነገር ግን ጥያቄውን አለመቀበሏን ተመለክቶ ለዲዮቅልጢያኖስ ወላጆቿ ክርስቲያን መሆናቸውን ገለጠ፡፡ ዲዮቅልጥያኖስም ወላጆቿን እንዲሰቃዩ አስደረገ፡፡ ከዚያም ሜሊተን (Melitene) ወደ ምትባል ስፍራ እንዲጋዙ አስደረገ በዚያም ስፍራ ስለ ክርስቶስ ብዙ መካራን ተቀብለው አረፉ፡፡

ዲዮቅልጥያኖስ ቅድስት ኪርያኬንም ወደ ማክስምያኖስ ላካት፡፡ ማስምያኖስም ክርስቶስን ክዳ ጣዖቶችን ብታመልክ ከዲዮቅልጥያኖስ ሀብታምና የቅርብ ዘመዶች ጋር እንደሚያጋባት ነገራት፡፡ ነገር ግን ሃይማኖቷን እንደማትቀይር እንዲሁም የዚህን ዓለም አብረቅራቂ ገንዘብ እንደማትመኝ ስትገለጽለት በንዴት እንድተገረፍ ማክስምያኖስ አዘዘ፡፡ ወታደሮቹም በቻሉበት መንገድ እርሷን መከራ አጸኑባት ሆኖም ግን ሃይማኖቷን አልካደችም ነበር፡፡ እንዲያውም ወታደሮቹ ከድካም የተነሳ ሦስት ጊዜ እንዲቀያየሩ ሆነ፡፡ በአንድ ምሽትም እግዚአብሔር ተገልጦ ‹‹ ኪርያኬ መከራና ስቃዩን አትፍሪ፣ መንፈሴ ካንቺ ጋር ነው፡፡›› አላት፡፡ ከብዙ መከራና ስቃይ በኋላ ቅድስት ኪርያኬን ሀሳቧን ለማስቀየር ባለመቻሉ ማክስምያኖስ አፍሮ ለሒራልዮን በኬልቄዶን በምተገኘው የቢታንያ ገዢ ሃሳቧን እንዲያስቀይር ላካት፡፡

እርሱም ቀድሞ እንደነበሩት በማባበል እንዲሁም በማስፈራራት ክርስቶስን እንድትክድ ቢጠይቃት ሰማዕቷ ግን በእምነቷ ጸናች፡፡ እንዲያውም የተቻለውን ያህል መከራ እንዲያጸናባት ተገዳደረችው፡፡ እርሱም ለብዙ ሰዓታት በፀጉሯ ተንጠልጥላ ከሥር ወታደሮች አካሏን እንዲያቃጥሉ አደረገ፡፡ ነገር ግን በዚህ መከራ ውስጥ ሆና ይበልጥ ጥንካሬና ብርታትን ማግኘት ቻለች፡፡ በዚያም ምሽት በወህኒ ሳለች ክርስቶስ ከቁስሏ ሁሉ ፈወሳት፤ ብዙ ጣዖት አምላኪዎች ይህንን ተመልክተው በእግዚአብሔር አመኑ፡፡

በነጋታውም ሒላርዮን መፈወሷን ተመልክቶ ጣዖቶቹ ለእርሷ አዝነው እንዳዳኗት ገለጸላት፡፡ ሒላርዮንም ወደ ቤተ ጣዖቶቹ እንዲሔዱና ምስጋና እንዲያቀርቡ አጥብቆ ለመናት፡፡ በክርስቶስ እንደተፈወሰች ነግራው ግን አብራው ወደ ቤተ ጣዖቱ እንደምትሔድ ነገረችው፡፡ ሐላርዮንም ያሸነፈ መስሎት ተደሰተ፡፡

በቤተ ጣዖቱ ሳሉም ቅድስት ኪያርኬ ሕይወት የሌላቸውን እነዚያን ጣዖቶች እግዚአብሔር እንዲያጠፋቸው ለመነች፡፡ በዚህም ጊዜ ታላቅ የምድር መናወጥ ሆነ፤ ጣዖቶቹም ወደ ምድር ወድቀው ተሰባበሩ፡፡ ሁሉም ጥለው ሸሹ፤ ሒላርዮንም በተደረገው ተአምር ክርስቶስን እንደማመን ጣዖቶቹን ስለወዳደሙ ተሳደበ፡፡ ስርሱም ወዲያውኑ በመብረቅ ተመትቶ ሞተ፡፡

ከሒላርዮን በመቀጠል የተተካው አፖልዮን ሰማዕቷ ላይ ብዙ መከራን አጸናባት፡፡ ወደ እሳት እንድትጨመር ቢያደርግ እሳቱ ይጠፋል፣ ወደ ምድር አውሬዎች ብትጣል ለማዳ ይሆናሉ፡፡ በዚህን ወቅት ሰማዕቷን በሰይፍ እንድትሰዋ አፖልዮን አዘዘ፤ ሰማዕቷ ቅድስት ኪያርኬ አንድ ጊዜ ከመሰየፏ በፊት ጸሎት እንድታደርግ ጠየቀች፡፡ በጸሎትም ነፍሷን እንዲቀበልና ሰማዕትነቷን የዘከሩትን እንዲያስባቸው ጠይቀች፡፡ ወታደሮቹም በሰይፍ አንገቷን ከመቁረጣቸው በፊት ቅዱሳን መላእክት ነፍሷን ከሥጋዋ ለዩት፤ ቅድስቷም በሰማዕትነት አረፈች፡፡

መታሰቢያዋ ሰኔ 30(July 7) ነው፡፡

የቅድስት ኪያርኬ በረከትና ምልጃዋ ይድረሰን፡፡[3]

ምንጭ

3. St. Kyriake of Nicomedia https://en.wikipedia.org/wiki/Kyriaki_(martyr) Saint Kyriake – Nazarene Art Icon

http://www.oramaworld.com/images/byzantine_icons/wooden/saint-kyriake-nazarene-art-icon-st_63_300.jpg 

4.     ቅድስት ካትሪን አሌክሳንድርያ

የቅድስት አርሴማ ተብለው ከሚታዩት ሥዕሎች ከቅድስት በርብራ፣ ቅድስት ሉሲያ እና ቅድስት ኪርያኬ በተጨማሪ በስፋት ባይሆንም አንዳንድ ጊዜ የሚታየው የቅድስት ካትሪን ዘአሌክሳንድሪያ ሥዕል ሲሆን፤ የእርሷ ታሪክ በአጭሩ ይህንን ይመስላል፡፡

saint-catherine-nazarene-art-icon-st_60_300
ቅድስት ካትሪን አሌክሳንድርያ  በባይዛታየን ቤተክርስቲያን አሣሣል የተሣለ

ቅድስት ካትሪን በአሌክሳንድርያ ኮንስታስ ከተባለ ሰው የተወለደች ንጹሕ፣ የተማረችና ውብ እመቤት ነበረች፡፡ በጽኑ የማያወላውል እምነቷ ፈጽማ የማክሲሚነስ ስሜታዊ እና ያልተገታ ነፍስ ድል አደረገች፡፡ በአንደበተ ርቱእነቷ ደግሞ ከእርሷ ጋር ሊከራከሩ የመጡትን የዘመኑ ፈላስፋዎችን አፍ አዘጋች፡፡ በ305 ዓ.ም. የሰማዕትነት አክሊልን ተቀዳጀች፡፡

ቅዱስ አካሏ ወደ ሲና በርሃ በመላእክት የተወሰደ ሲሆን ከብዙ ዘመናት በኋላም ሲገኝ ቀድሞ በጌታ ደብረ ታቦረ ቤተክርስቲያንና የሲና ሐመልማል አሁን በሰማዕቷ በተሰየመው ቤተክርስቲያን ተወሰደ፡፡

መታሰቢያዋ ሕዳር 16 (November 25)

የቅድስት ካትሪን በረከትና ምልጃዋ ይድረሰን፡፡

ምንጭ

http://www.oramaworld.com/en/p/10486/Saint_Catherine_-_Nazarene_Art_Icon

ተፈጸመ፡፡

© ከኃይለማርያም ሽመልስ ሰኔ 2007 ዓ.ም.

Advertisements

6 thoughts on “ቅድስት አርሴማ፡ ትክክለኛው የቤትርስቲያን ሥዕሏ የቱ ነው? የመጨረሻ ክፍል

ምላሽ ይስጡ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s